مراجعة huawei matepad 10.4 مميزات وعيوب - سمارت سيرفس

نوفمبر 25, 2020

post-thumnail

فى الفترة إللى فاتت نزل تاب جديد من شركة huawei بمواصفات قوية جدا وسعر يعتبر كويس تقريبا إلى حد ما.

وطبعا كتير بنشوف ناس بتعمل ( مراجعات ) للأسف مش بكل شفافية لإنه ببساطة واخد الموبايل أو التاب هدية أصلا من الشركة.

أنا مجرد هحكى تجربتى كاملة بعد شراء التاب huawei matepad 10.4 وبعد تجربة حوالى شهر ( بكل حيادية ).

فى البداية التاب مش بيدعم خدمات ( جوجل ) وهنتكلم عن الجزء ده بالتفصيل بعد ما نقول نقاط القوة و الضعف.

فخامة التصميم

تصميم التاب تقليدى مش مميز ولكن إللى بيميز التصميم فعلا قوة الماتريال المستخدم مش هتحس إنك ماسك تاب ب 6000 جنية تقريبا ولكن الجودة لو هتتقارن هتتقارن بمنتجات Apple حرفيا.

الجسم بيجى معدن بالكامل وانت شايل التاب هتحس بقوته جدا مش سهل الكسر ولا خفيف ولا ضعيف ودى أول نقطة تحسب له فعلا ولكن كل شىء وله عيوب مفيش شىء كامل عموما ، زى للأسف إن مفيش له إكسسوارت عشان حجم الشاشة غريب 10.4 حتى الأسكرين انا اشتريتها بحوالى 400 جنية وطبعا التاجر لازم يستغل ده !.

وعلى الرغم من ده وفقت له جراب صغير بحوالى 250 جنية تقريبا ، طبعا الناس اللى حجزت وإشترت من فترة كان بيجى معاه جراب.

قوة الأداء

التابلت هيديك أداء فوق الممتاز مش بسبب المعالج ولا الرام بس اللى بتيجى 4 جيجا ! مع ذاكرة 64 جيجا ، ولكن بسبب التحسينات إللى ع النظام و الخواص إللى شركة هواوى ضافتها للجهاز ، هتحس إنك بتتعامل مع لاب توب وهتقدر تنجز مهامك اليومية ، مع بطارية حرفيا إدتنى إستخدام متواصل يوم كامل أكثر من 12 ساعة ( Screen On ) ومش اقل من 3 إلى 4 ايام لو إستخدامك خفيف مع العلم إنه بيشحن كامل فى حوالى 3 ساعات.

شاشة ممتازة

هتستمتع بتجربة مشاهدة فيديوهات قوية جدا وممتازة على شاشة كبيرة وواضحة وكثافة ألوان رهيبة جدا ، و الأجمل إنها بتدعم الرسم عليها بدون مشاكل ولكن طبعا مع قلم هواواى ، والقلم بيتباع بسعر منفصل ، للأسف كان نازل بس هدية مع الناس اللى حجزت حجز مسبق على سوق وجوميا.

عيوب قد تهمك !

نيجى للعيوب ( زى ما قولنا مش بيدعم خدمات جوجل ، يعنى إيه ؟ ) …

  • يعنى مش هتقدر تاخد بيك اب من الواتساب.
  • يعنى مفيش تطبيق خرايط جوجل.
  • يعنى مفيش ميوزيك جوجل .
  • يعنى مفيش يوتيوب .
  • يعنى معظم التطبيقات مش موجوده على متجر هواوى ومفيش متجر جوجل.

الوجه المشرق إن بكل بساطة تقدر تستخدم اى متصفح وتدخل على يوتيوب عادى جدا بدون مشاكل ، ونفس الموضوع بخصوص الخرايط فى تطبيق بديل ،والتطبيقات بتقدر تنزلها من متجر خارجى ، اللى هواواى عاوزه تعمله إنها تقدر تعمل زى جوجل بدون ما تكون محتاجه له وده فعلا حصل فى هواوى ميوزيك وتطبيقات كتير جدا حتى المطورين شغالين على تعديل التطبيقات بحيث إنها تشتغل على هواواى أكونت وتقدر تعمل بيه تسجيل دخول بدون مشاكل.

الخلاصة : ممكن ميناسبش ناس كتير ولكن لو إنت مش فارق معاك كل اللى فوق ده تقدر تشترية لإن بكل بساطة انا واحد من الناس عارف هستخدم التاب ليه ؟ ، ولكن لو إنت كابتن اوبر او كريم او بتحتاج خرايط جوجل دايما فمنصحش بيه ولكن لو إستخدامك فيسبوك وتصفح ومالتى ميديا عموما ، فهيكون مناسب جدا وهيقدم قيمة كويسة مقابل سعر.

 التقييم العام للتاب : 8/10

القيمة مقابل السعر : 7/10

سعر الجهاز حاليا وقت كتابة المراجعة : 5450 جنيه على سوق كوم و 5800 فى المحلات

سمارت سيرفس

اترك رد

× لديك إستفسار ؟ تواصل معنا