مراجعة لاب توب Lenovo ideapad l340 gaming - سمارت سيرفس

لما بتفكر تشترى لاب توب بتدور أكيد على لاب توب مناسب لإستخدامك ( مش شرط إللى يناسبك يناسب غيرك ) لإن كل شخص له إستخدامات مختلفة للاب توب ، انا مثلا بستخدم اللاب توب جيمنج خفيف جدا ، مع شغل developer و support، فطبيعى تشترى اللاب توب إللى مناسب لإستخدامك مش شرط يكون الأفضل او الأحدث ، لكن شرط يكون مناسب إستخدامك إنت ويلبى كل إحتياجاتك بدون مشاكل او بطىء.

ولما قررت أشترى لاب توب جديد بعد ما اللاب توب بتاعى حصل فيه مشاكل قررت اشترى جديد خصوصا إن المستعمل اسعار مبالغة فيه جدا وغير عمليات النصب اللى بتحصل من بعض تجار المستعمل وللأسف مش هتبقى ضامن المنتج ، ولما فكرت أشترى لاب توب جديد دورت كويس جدا عشان أقدر أختار لينوفو l340 ، خصوصا إن كان فى منافسيين كتيييييييير فى نفس الفئة خصوصا MSI إللى شكلة قوى جدا و Acer .

قبل ما نتكلم عن مواصفات اللاب توب Lenovo ideapad l340 gaming لازم نعرف معلومة مهمة جدا إن اللاب توب ده بيتوفر بأكثر من إصدار ، i5 و i7 مع هارد 1000 جيجا + 250 SSD و i7 مع هارد جزء واحد 1000 جيجا SSD وده إللى انا اشتريته وكان افضل بالنسبالى ، خصوصا إنه كان متوفر وقت شراءة بحوالى 17000 جنية مصرى من 3 شهور تقريبا !! ، ورغم إن حاليا سعره وصل أكثر من 19 الف جنية.

فأنا هنا هتكلم عن مواصفات اللاب توب إللى انا اشتريته اللى هو مع هارد 1000 حيحا SSD.

مواصفات Lenovo ideapad l340 gaming

Processor : 9th Gen Intel® Core™ i7-9750H
Graphics : NVIDIA® GeForce® GTX 1650 ( 4GB )
Memory : 16GB DIMM
Battery : 9.5 hours*, with Rapid Charge technology
Storage : 1TB PCIe SSD
Display : 17.3″ FHD
Audio : 2x 1.5W speakers with Dolby® Audio
Camera : HD 720p with dual-array mic and physical shutter

مميزات Lenovo ideapad l340 gaming

• اداء قوى.
• كيبورد كامل مضىء بـ 2 مستوى للإضاءة.
• ماتريل ممتاز جدا.
• شحن سريع.
• بطارية ممتازة.

عيوب Lenovo ideapad l340 gaming

• الماوس باد مش الأفضل.
• الشاشة مش من نقاط القوة لو بتستخدم برامج مونتاج.
• وجود 2 منفذ usb فقط
• الكيبورد مش قوية للأسف.

مراجعة Lenovo ideapad l340 gaming

ببساطة : ممتاز ! ….اللاب توب بيديك أداء خيالى فعلا سواء فى التصفح او الشغل او حتى الجيمنج على أعلى أداء بدون تهنيج او اى مشاكل ممكن تشوفها ، ماتريال الجهاز ممتاز ، الجهاز بيسخن فعلا زى ما هو شائع ولكن مش بالشكل اللى كنت متوقعه السخونة عادية جدا زى اى لاب توب تانى ، الكيبورد المضىء بيديك أحساس حلو وخصوصا إنه كامل مش زى بعض اللاب توب بيبقى الكيبورد من غير الأرقام ، الجميل جدا فى اللاب توب ده لو هتستخدمه كشغل بس وتصفح هيديك أداء بطارية 7 ساعات تقريبا ، ولكن مع كل المميزات دى لازم تظهر عيوب أكيد … زى التاتش باد ( الماوس ) مش حلوة فى الإستخدام ولكن مش هتفرق بالنسبالى أو بالنسبة لأى شخص عموما لإن طبيعى اغلبنا بيستخدم ماوس خارجى والتاتش باد بتبقى أحيانا كتقضية غرض بس لو إنت برا البيت او برا الشغل.، و الكيبورد بيدخل فيها تراب بسرعه ومش ضد المياة ، وللأسف مفيش مجال إنك تزود رامات ولكن عموما الجهاز بيجى برامات 16 جيجا كفاية جدا لشغلك وللالعاب ولكل حاجة تقريبا ، لو إنت بتاع مونتاج مش هيناسبك اللاب توب ده مش عشان ضعيف ،ولكن لإن الشاشة مش هتديك أداء عالى جدا والوان قوية بالشكل المطلوب ومع ذلك الشاشة ممتازة ولكن انا بتكلم عن المونتاج فقط ، كقيمة مقابل سعر ( خصوصا السعر القديم 17000 ) ممتازة جدا والأفضل ولكن حاليا مع ارتفاع الأسعار اشوف إن السعر مبالغ فيه إلى حد ما لنسخة الi7 حوالى 21000 جنية.

سعر Lenovo ideapad l340 gaming

سعر اللاب توب وقت كتابة المراجعة : 21000 جنية.

سمارت سيرفس