مراجعة موبايل بلية من فودافون أرخص موبايل 4G - سمارت سيرفس
نوفمبر 25, 2020
فى الفترة إللى فاتت إنتشر إعلان موبايل بلية من فودافون كأرخص موبايل 4G فى مصر بسعر 499 جنية وبما إنى عميل ( RED ) من فودافون وكان معايا شوية نقاط من ريد فقررت أبدلهم بالموبايل ده وأجربة بنفسى وبعد تجربة كام شهر قررت أكتب المراجعة دى.
موبايل بلية او “IKU” هو فعلا موبايل غريب بمعنى الكلمة مش هتبقى فاهم هو إنت ماسك موبايل قديم ولا موبايل حديث …!
هو حاجة كده ما بين السمارت فون و الموبيلات بتاعت زمان أم زراير ، موبايل بيجى ب4G وواى فاى وبلوتوث و2 كاميرا وفى نفس الوقت بزراير …؟.
الموبايل بيجى بنظام “KAIOS” وده نظام زى الأندرويد كده ولكن لسه فى بدايته او بمعنى أصح مفيش له مطورين كثيرة او ناس بتدعمه وأغلب الشركات بتحطة فى الموبيلات الرخيصة جدا زى “IKU” إللى هو بلية من فودافون ، والنظام مش مقتصر على الموبايل ده بس ولكن إللى نزل فى مصر هو “بلية” من فودافون ، وطبعا بيتوفر فى النظام ده “متجر” هتلاقى فيه شوية تطبيقات ممكن تنفعك.
ورغم توافر فيسبوك وتويتر إلا إن استخدامهم هيكون صعب جدا عشان الموبايل زراير ، وتقريبا إنت هتستخدمة كموبايل عادى للإتصال بس وحتى صوت الموبايل فى الإتصال مش كويس جدا مش الأفضل يعنى ولكن افضل إستخدام ممكن تستخدمه للموبايل من وجهة نظرى ( WIFI Hotspot ) او كبديل لـ USB ، إنك ممكن تركب فيه خط داتا او حتى خط موبايل وتعمل شير للإنترنت لإنه بيدعم 4G.
عيوب ومميزات موبايل بلية من فودافون
مينفعش اقول عيوب ومميزات واقارن الموبايل بـموبايل رائد مثلا او موبايل فى فئة أعلى فلازم نسأل نفسنا الأول هو 499 جنية ممكن يجيبوا موبايل نوعة إيه ؟،وطبعا للأسف مش هتلاقى إختيارات قدامك غير موبايل نوكيا او زراير او الموبيلات إللى مش معروفة اصلا نهائى بزراير بردوا …!.
فبكل بساطة لو هنقارن بنفس الموبيلات دى فموبايل بلية يكسب ، لإن مفيس موبايل ب 499 جنية هيوفر لك واى فاى وبلوتوث و 4G و2 كاميرا ومكان لخطين وكارت ميمورى.
وأكتر العيوب إللى لاقيتها فى الموبايل او أزعجتنى شوية او شوتين ثلاثه أربعه كده يعنى ، إن زمن الشحن طويل إلى حد ما بيوصل ساعتين ! رغم إن البطارية مش ضخمة ، وزراير الموبايل تقيلة فى الإستخدام يعنى لازم تضغط أكثر من مرة عشان يتستجيب معاك ، وللأسف صوت المكالمات مش واضح او مش الأفضل فى فئة ال500 جنية ، ولكن مينفعش اقارن كاميرا او اى حاجة تانية لإنه ببساطة هيبقى بظلم الموبايل لإنه فى فئة أقل من اقل فئة.
سعر موبايل بلية من فودافون
سعر الموبايل وقت كتابة المراجعة ( 499 جنية ) فى جميع فروع فودافون وبيجى معاه عرض دقايق ونت تقريبا.
الخلاصة
الموبايل مش مناسب لإستخدامه كموبايل أساسى ولكن ممتاز جدا كموبايل ثانوى او بسيط تستخدمه فى وقت الضرورة ، او ممكن تستخدمة زى ما انا استخدمته كـ HotSpot ، وكان ممتاز جدا فى إستخدامى له بديل لفلاشة النت.
